Музичарот стоеше зад проекти како Ray of Light на Madonna, 13 на Blur и хит-сингловите Pure Shores и Black Coffee на All Saints.
Британскиот музички продуцент William Orbit, чиј препознатлив сонлив, но истовремено динамичен стил внесе нова енергија во музиката на Madonna, Blur, All Saints, U2 и многу други изведувачи, почина на 69-годишна возраст.
Во соопштение објавено на неговите социјални мрежи, потпишано од неговото семејство и пријателите, се наведува дека починал во својот дом на 23 јули.
„Ќе ни недостига неизмерно, како и на многумина чии животи ги допре со својата музика, пријателство и добрина“, стои во соопштението.
Причината за смртта не е соопштена.
Orbit беше најпознат по соработката со Madonna на албумот Ray of Light (1998). Неговите оригинални музички подлоги, инспирирани од trip-hop, jungle и techno, означија ново поглавје во кариерата на една од најголемите поп-ѕвезди, создавајќи хитови како “Frozen”, “The Power of Goodbye” и насловната “Ray of Light”.
Албумот оствари повеќекратен платинест тираж ширум светот, ѝ донесе на Madonna три од петте освоени Grammy награди во 1999 година и денес многумина го сметаат за нејзино најдобро студиско издание.
Но, неговата работа далеку ја надмина соработката со Madonna. Orbit беше продуцент и на експерименталниот албум 13 на Blur, на британскиот број еден “Pure Shores” на All Saints, на хитот “Feel Good Time” на Pink, кој стигна до третото место во Велика Британија, како и на многу други проекти.
Како соло-изведувач, тој објави бројни албуми и синглови. Неговата електронска обработка на “Adagio for Strings” од Samuel Barber, дополнета со trance ремикс на Ferry Corsten, стигна до Топ 5 во Велика Британија во 1999 година.
Успехот во поп-музиката дојде релативно доцна. Роден како William Wainwright во 1956 година, пораснал во северен Лондон како син на двајца наставници, кои самиот ги опишуваше како „одлучно работничка класа и сиромашни… луѓе кои се бореле да станат средна класа“.
Го напуштил училиштето на 16 години и живеел како, според неговите зборови, „пост-хипик“, престојувајќи во сквотови, работејќи повремени слабо платени работи и, како што самиот раскажувал, консумирајќи „по едно Mars чоколадо и една доза LSD дневно“.
Во 1980 година го формира електронското/амбиент трио Torch Song со Laurie Mayer и Grant Gilbert. Групата потпиша договор со издавачката куќа IRS и објави три албуми меѓу 1984 и 1987 година.
Откако стекна големо искуство во електронската продукција, создавајќи студио исполнето со дигитална и аналогна опрема, беше ангажиран да ја компонира музиката за филмот Youngblood со Rob Lowe и Patrick Swayze, како и да изработува ремикси за поп-ѕвезди, меѓу кои и Madonna.
Со hip-house ритмови и разиграни инструментални аранжмани им даде нова енергија на нејзините рани хитови “Justify My Love” и “Erotica”.
Madonna тогаш веќе го забележала, но нивната вистинска креативна соработка започнала дури во втората половина на 1990-тите. Во меѓувреме, Torch Song објавија уште еден албум во 1995 година, а Orbit имаше успех и со проектот Bassomatic, чиј сингл “Fascinating Rhythm” стигна до британскиот Топ 10.
Својот прв соло-албум го издаде во 1987 година, а во 1990-тите доби големо признание со серијата албуми Strange Cargo. На Strange Cargo III (1993) гостуваше младата Beth Orton, а истата година Orbit го продуцираше и нејзиниот деби-албум Superpinkymandy, подоцна ремиксирајќи го и синглот “Central Reservation”.
Во тоа време Madonna се обидуваше повторно да се пронајде музички. Ги прекина сесиите со R&B продуцентот Babyface и бараше нов соработник. По препорака на нејзиниот менаџер, Orbit испрати свои демо-снимки и беше избран.
Подоцна изјави:
„Само продолжете да работите, усовршувајте го својот занает и порано или подоцна ќе ви се насмевне среќата.“
Тој и Madonna го создадоа најголемиот дел од Ray of Light во студија во Њујорк и Лос Анџелес.
Madonna тогаш изјави:
„William е целосно луд гениј. Ќе му кажев во кој музички правец сакам да одам, ќе му потпевнев мелодии или ќе му ги прочитав стиховите, а потоа ќе го оставев сам во неговата лабораторија. Понекогаш одеше токму таму каде што очекував, а понекогаш сосема во друг правец. На крај добивавме trance композиции долги осум минути, па потоа додававме и одземавме сè додека не добиевме вистински куплети и рефрени. Навистина работевме максимално посветено.“
Неверојатната разновидност на Orbit од тешки breakbeat ритми и акустични гитари до trance синтисајзери беше искористена и за емотивни балади и за енергични денс композиции, со што повторно ја позиционира Madonna како една од најиновативните поп-уметници.
За следниот албум Music, Madonna избра нов главен продуцент, Mirwais, но Orbit сепак продуцираше три песни. Тој стоеше и зад двата успешни самостојни сингла што Madonna ги сними за филмови: “Beautiful Stranger” (1999) од Austin Powers: The Spy Who Shagged Me и нејзината обработка на “American Pie” (2000) од филмот The Next Best Thing.
Повторно соработуваа и на албумот MDNA (2012), каде Orbit беше копродуцент на шест песни.
Годинава тој изјави:
„Секогаш ќе ја сакам таа жена. Навистина. Таа ми ја создаде кариерата.“
Крајот на 1990-тите беше исклучително плоден период за него. Во 1999 година го објави албумот Pieces in a Modern Style, со современи обработки на класични композиции.
Истата година го продуцираше и албумот 13 на Blur. Групата сакаше нов правец по пет албуми со Stephen Street, а Damon Albarn подоцна изјави дека Orbit бил „како психијатар“ за време на снимањето.
Како и Ray of Light, албумот 13 денес се смета за едно од најзначајните изданија во кариерата на Blur, со хитови како “Tender” и “Coffee and TV”.
По успехот на Ray of Light, со него работеа бројни големи имиња, меѓу кои Britney Spears, Melanie C, Robbie Williams, Chris Brown, Pink, No Doubt и Nadine Coyle.
Заедно со Beck ја создаде “Feel Good Time” на Pink, а својот препознатлив звук го внесе и во двата големи британски број еден хитови на All Saints – “Pure Shores” и “Black Coffee”.
Во интервју за The Guardian во 2021 година признал дека првично мислел оти “Pure Shores” е „чисто ѓубре“, бидејќи премногу долго работеле на песната.
„Кога навистина се мачиш околу нешто, потребни се години за повторно да можеш да го слушаш со задоволство.“
Со All Saints повторно работеше и на две песни од албумот Testament (2018).
За U2 ги продуцираше “Electrical Storm” и “The Hands That Built America”, темата на филмот Gangs of New York на Martin Scorsese.
Неговиот единствен целосен студиски проект за друг поп-изведувач беше албумот The House на Katie Melua (2010).
Подоцна го доврши и долгоочекуваниот дует “There Must Be More to Life Than This” на Freddie Mercury и Michael Jackson, кој беше објавен во 2014 година.
Продолжи да издава и соло-албуми, а неговото последно студиско издание е The Painter (2022).
Во март годинава ги демантираше шпекулациите за нов проект со Madonna, изјавувајќи дека „Ray of Light 2.0 нема да се случи“.
Во интервју за The Guardian од 2021 година зборуваше и за својата борба со зависностите. Покрај марихуана, користел LSD, печурки, MDMA, кокаин, кодеин и хормони, што на крајот довело до психотична епизода и хоспитализација.
„За среќа, кога дрогата целосно излезе од мојот организам, повторно станав нормален и излегов од болница“, изјави Orbit.